O directo da Orquestra Bravú Xangai ofrece unha homenaxe á verbena e ao espíritu bravú co seu novo disco “Os saxofóns de Occidente”. Un traballo que contén 17 cancións, cun feixe de músicas festivas para bailar e brincar ate que saia o sol.

Pode que a fin do mundo estea preto mais, se pola Orquestra Bravú Xangai fose, o mundo sería un baile eterno, unha repichoca sen fin, unha festa sen medida con gosto a sal e licor como boa bacanal bravú. A Xangai, con Xurxo Souto ao frente, segue co facho do bravú prendido 30 anos despois daquel glorioso momento, a fundación do Bravú en Chantada en novembro de 1994.